Abahezanguni barashaka gutsinda amatora mu Bufaransa ariko bashobora kubura ubwiganze

Umugore urimo gutora mu Bufaransa ari kumwe n'imbwa ye
  • Umwanditsi, Paul Kirby
  • Igikorwa, BBC News i Paris

Abafaransa barimo gutora muri amwe mu matora akomeye cyane abayeho mu myaka ishize, aho uruhande rw'abahezanguni bakomeye ku bya kera rwizeye kubona intsinzi yandika amateka, ariko igishoboka cyane ni uko nta ruhande rugira ubwiganze.

Ubu ni bwo bwa mbere ishyaka rya Rassemblement National (RN) rya Marine Le Pen na Jordan Bardella ribonye amahirwe nyayo yo kuba ryayobora leta no kuba ryayobora mu buryo busesuye inteko ishingamategeko.

Ariko nyuma y'intsinzi yo ku cyumweru gishize ya RN mu cyiciro cya mbere cy'aya matora y'abadepite, yabaye mbere y'igihe cyari giteganyijwe, abakandida b'abacyeba bikuye mu guhatana kugira ngo bahe abandi bakandida amahirwe menshi yo gutsinda iri shyaka ry'ubuhezanguni mu gukomera ku bya kera.

Gutora byatangiye mu Bufaransa ku isaha ya saa mbili za mu gitondo (8:00) zaho, ari na yo saha yo mu Rwanda no mu Burundi. Amakuru ya mbere y'ibyavuye mu matora aratanganzwa nyuma y'amasaha 12.

Ibiva mu matora uko byaba bimeze kose, biragoye kubona Perezida Emmanuel Macron asohoka muri ibi neza.

Mu byumweru bine bishize, yavuze ko guhamagaza aya matora mbere y'igihe cyari giteganyijwe ari cyo gisubizo gishyize mu gaciro, nyuma y'intsinzi y'ishyaka rya RN mu matora y'inteko ishingamategeko y'Ubumwe bw'Uburayi.

Icyo gihe hari hashize iminota Jordan Bardella, umukuru wa RN w'imyaka 28, amukabije ngo ayahamagaze.

Aya matora yo mu byiciro bibiri yatunguye iki gihugu kirimo kwitegura itangira ry'imikino ya Olempike ya Paris ku itariki ya 26 y'uku kwezi kwa Nyakanga (7).

Umutekano wari usanzwe warakajijwe, none ubu abapolisi 30,000 bagabwe mu bice bitandukanye by'igihugu muri iki gihe ubushyamirane muri politiki buri hejuru.

Umugore urimo kugenda iruhande rw'ibyapa byo kwamamaza bya Marine Le Pen na Jordan Bardella byatabuwe igice mu maso

Ahavuye isanamu, Mohammed Badra/EPA-EFE/REX/Shutterstock

Insiguro y'isanamu, Ibyapa byo kwamamaza by'ishyaka Rassemblement National biriho Marine Le Pen na Jordan Bardella, aho kubaho abakandida bo mu turere

Hari ubwoba ko urugomo rushobora kwaduka mu murwa mukuru Paris no mu yindi mijyi y'iki gihugu, ibiva mu matora uko byaba bimeze kose, ndetse imyigaragambyo yari iteganyijwe ku mugoroba wo kuri iki cyumweru hanze y'inteko ishingamategeko, yabujijwe.

Mu mujyi wa Dreux, ubumbatiye amateka, wo mu nzira yerekeza i Normandie, aya matora yo kuri iki cyumweru ahuriranye n'umunsi urumuri rw'imikino ya Olempike ruwunyuramo.

Pauline, wo mu biro bishinzwe ubukerarugendo by'uyu mujyi, ati: "Kuri twe ni ikintu gikomeye cyane, kiruta amatora."

Urwo rumuri rw'imikino ya Olempike rumaze amezi hafi abiri ruzengurutswa mu bice bitandukanye by'Ubufaransa, ndetse uyu mujyi wa Dreux wateguye ibirori byo kwizihiza ukuhagera kw'urwo rumuri.

Antoine, utuye i Dreux, yabwiye BBC ati: "Macron yari akwiye gutegereza [imikino ya] Olempike ikarangira."

Abapolisi bari mu muhanda
Insiguro y'isanamu, Mu mujyi wa Dreux, aya matora yahuriranye n'umunsi urumuri rw'imikino Olempike ruhagerera

Nicolas Baverez, ukurikiranira hafi ibibera mu Bufaransa, yemeza ko Perezida Macron yatwitse iyi manda ye ndetse ko yafunguye amarembo y'ubutegetsi arayarangaza ku bahezanguni.

Mu nkuru yanditse ku wa gatanu w'iki cyumweru mu kinyamakuru Le Point cyo mu Bufaransa, Baverez yagize ati: "Yabangamiye imigendekere ya Olempike ya Paris 2024, ibi bishobora kwangiza burundu icyubahiro n'isura y'Ubufaransa."

Akarere k'amatora umujyi wa Dreux uherereyemo, ni kamwe mu hantu hahanzwe amaso muri iki cyiciro cya kabiri cy'amatora.

Abakandida nka Marine Le Pen na Jordan Bardella bamaze gutsindira imyanya yabo mu nteko ishingamategeko mu cyiciro cya mbere, nyuma yo kubona amajwi arenze kimwe cya kabiri.

Ariko indi myanya 500 ibyayo birasobanuka muri iki cyiciro cya kabiri cy'amatora. Mu duce dutandukanye, ahanini hari uguhatana kw'abakandida babiri cyangwa batatu.