Umunyabugeni wo muri Tanzania watwitse ifoto ya perezida yafunzwe

Umunya-Tanzania ukora ubugeni bw'amashusho asize irangi, washinjwe gutwika ifoto ya Perezida wa Tanzania Samia Suluhu Hassan, yakatiwe gufungwa imyaka ibiri cyangwa kuriha amande y'amadolari 2,000 y'Amerika (arenga miliyoni 2,5Frw) nyuma yo guhamwa n'ibyaha bikorerwa ku rubuga rwa internet.

Shadrack Chaula yatawe muri yombi ashinjwa gufata videwo yahererekanyijwe cyane, imugaragaza atwika ifoto ya Perezida Samia, ari na ko amutuka mu magambo.

Mu rukiko, Chaula, w'imyaka 24, yemeye ko yakoze icyo cyaha ndetse yananiwe kwisobanura.

Gutabwa muri yombi kwe kwateje impaka mu mategeko, abanyamategeko bamwe bavuga ko nta tegeko ryarenzweho mu gutwika iyo foto.

Bamwe mu bakoresha imbuga nkoranyambaga batangiye igikorwa cyo ku rubuga rwa internet cyo gukusanya amafaranga yo kwishyura amande ya Chaula kugira ngo arekurwe.

Mu 2018, Tanzania yashyizeho amategeko akaze ahana gukwirakwiza "amakuru y'ibinyoma". Abanenga ayo mategeko babona ko ari uburyo bwo kugabanya ubwisanzure bwo kuvuga icyo umuntu atekereza.

Polisi yavuze ko Chaula yakoresheje "amagambo akomeye" kuri perezida muri videwo yatangaje kuri konti ye yo ku rubuga rwa TikTok ku itariki ya 30 Kamena (6), mu cyaro cya Ntokela, mu ntara ya Mbeya, mu majyepfo ashyira uburengerazuba bwa Tanzania.

Ku wa kabiri, umukuru wa polisi muri ako gace Benjamin Kuzaga yabwiye abanyamakuru ko ibyaha uwo munyabugeni ashinjwa birimo gutwika ifoto ya perezida no gukwirakwiza amakuru agayitse ku rubuga rwa internet.

Kuzaga yagize ati: "Si umuco w'abaturage ba Mbeya gutuka abategetsi bacu b'igihugu."

Abanyamategeko bamwe bavuze ko nta tegeko rihari rihana gutwika ifoto ya perezida.

Umunyamategeko Philip Mwakilima yabwiye ikinyamakuru Mwananchi cyo muri Tanzania ati:

"Iyo foto yafashwe n'umufotozi wa leta? Reka ajye ahagaragara asobanure ingaruka yayo kuri sosiyete no ku gihugu. Ni nde ushobora kugaragaza itegeko ryuko gutwika ifoto ari icyaha?"

Ariko icyo gikorwa, gifatwa ko kitaboneye muri Tanzania, cyateje uburakari muri rubanda.

Ku wa kane, umucamanza Shamla Shehagilo yahamije Chaula icyaha cyo gukwirakwiza videwo kuri TikTok zirimo amakuru atari ukuri, arenze ku mategeko ya Tanzania agenga ibitangazwa ku mbuga za internet.

Urukiko rwanzuye ko ibikorwa bye ari itoteza ryo ku rubuga rwa internet no gushishikariza kwigomeka.

Ibitangazamakuru byo muri Tanzania byavuze ko Chaula yakomeje guceceka ubwo yari ahawe umwanya ngo yiregure.

Umushinjacyaha yari yasabye urukiko kumukatira igihano gikaze mu rwego rwo guha isomo abandi "ntibasuzugure" perezida.

Uru rubanza rwateje impaka mu gihugu, abarunenga bavuga ko icyo gihano gikaze cyane ndetse ko kigaragaza ukuntu leta yibasira abatavuga rumwe na yo.

Perezida Samia, wageze ku butegetsi mu mwaka wa 2021, yashyizeho amavugurura yafunguye urubuga rwa politike n'urw'abaturage.

Ariko abatavuga rumwe n'ubutegetsi hamwe n'imiryango iharanira uburenganzira bagaragaje impungenge ko iki gihugu kirimo gusubira muri gahunda za politiki za kera.