Metadata

Dit artikel is gesjreve (of begós) in 't Heëlesj. Laes hie wie v'r mit de versjillende saorte Limburgs ómgaon.

Metadata zint gegeëves die de karakteristieke van anger gegeëves besjrieve. Me kint dus sjpreëke van data uuever data. Zo'n gegeëves make 't truukvinge van informatie mekkeliger.

E klassiek vuurbild doava zint fysieke catalogi mit keëtjes of nómmere op d'r umsjlaag van beuk in de bibliotheek. In d'r eenentwintigste ieëw hat d'r term geweunlich ieëder betrekking óp digitaal gegeëves. Vuural in fysieke archieve weëde analoge metadata nog óp groeëte sjaal gebroek.

Bei digitaal metadata kint me dinke aan besjtands- en mapname óp d'r computer of documentname in e zaaksysteem wat bei de uueverheed gebroek weëd. Metadata besjrieve dan neet alling d'r inhaod, meh hant dan 'n administratief functie. Heimit kint me d'r vuurtgank va werkprocesse beëter i beeld bringe en de kwaliteet doava bewake. Dit hölp dan bei de deensverlening.

Wichtig is um unieke data of unieke combinaties te gebroeke. Doadurch kint me rillevante informatie sjnel en oane vöal muijte truukvinge i zeukfuncties. Neet alle meugelige metadata zint evvel va rillevantie. De keuze vuur metadata mót dus aafgesjtumt zieë óp de behoofte van d'r gebroeker, 't werkproces an sich of wettelige bepalinge. Zoeë zint datums en tiedsjtippe va groeëte rillevantie vuur juridische procedures, dewiel alfabetische categorisatie durch middel van trefwöad, nómmere of letters 't truukzeuke van artikele in 'n encyclopedie of wöad in e woadbook mekkeliger maak.

Ooch óp Wikipedia weëde metadata gebroek. Durch de categorieë hei-ónger kint me beivuurbild dit artikel beëter truukvinge en dat hölp ooch bei 't vinge van artikele uuever vergeliekbaar óngerwerpe (of in dit geval artikele die op 't Heëlesj zint gesjrieëve). Anger Wikideenste, wie beivuurbild Wikinuujs of Wiktionary, werke volges 'tzelfde principe.